CLICK HERE FOR THOUSANDS OF FREE BLOGGER TEMPLATES »

Tuesday, July 10, 2007

تخاريف حميريه فى المسأله السعريه


وبعد يوم طويل وشاق،نهق الحمار السيد أبوشناق،وقال للحمار السيد بهلول،والله لك وحشه ده أنا مشتاق لك على طول،ماتيجى أعزمك على حسابى ونسهر فى كازينو جراند الحمير،أهو نفك عن نفسنا وننسى شيل إشولة القطن والعلف قناطير.

بهلول ماكدبش خبر،وشدو الرحال ،وقصدوا كازينو جراند الحمير،وطلبوا المترحمار وفى اللحظة والتو جالهم بدون تأخير،طلب السيد الحمار بوشناق كبايتين دوبل من عصير البرسيم،قاله السيد الحمار بهلول تعرف ياحمار ياخويا إن عصير البرسيم ثبت إن فيه فيتامين ميم، المهم إيه رأيك ياحمار فى خبر سمعته موش فاهمه،من رئيس وزارة البنى آدمين،والله مانى فاكر إسمه عبده ولاأحمد ،الظاهر إن إسمه أمين،تصور بيقول إن التضخم نزل عليه التخفيض عن الشهور إللى فاتت،و أنا شايف كحمار إن ألأسعار ولعت وإزدادت!!

رد عليه السيد بوشناق الحمار بهدوء وقال أنا أعتقد إن واحد وواحد يبقوا إتنين،ودى حقيقه مابيختلف عليها إتنين،قال السيد الحمار بهلول ايش قصد أستاذنا الحمار ؟؟

قال السيد الحمار بوشناق،الكلام ده فيه وجهات نظر تلاقيه صح فى إستراليشيا وجزر الواق واق،أوفى جنوب أفريقيا ،و،إنما ييجى لمصر ومايمشيش،ولا تلاقيه لامؤاخذه راكب فى القاهره ولا حتى ماشى فى كمشيش،موش بيقولوا مصر بلد العجايب،إللى مطنشين كل شىء عن الحاضر أو يعرفوا حاجه عن الغايب،ده ملك ربنا ياحمار ياخويا منظمه سيدك،لاتقول ده ببحصل بإيدى ولابإيدك!!

السيد الحمار بهلول إنجعص فى الكرسى ورسم نفسه زى البنى آدمين،تمام زى مابيشوف صاحبه عم أمين،وقاله يا أستاذ الحمار بهلول ياخويا إنت عارف إنى حمار تقاويه نخاله وغبى ،وضحلى أو إشرحلى الحكايه والنبى

قاله السيد الحمار بوشناق شوف ياحمار:فيه علاقه تناسب طردى بين إرتفاع ألأسعار و اللى بترتفع بجنون، وبين إرتفاع نسبة التضخم وإنت عارف طبعآ إن الجنون فنون، ،لما واحد منهم يزيد، التانى يغير منه وبرضه يزيد وده ثابت بكل تأكيد،علشان كده فى مصر الشهر إللى فات هبه ألأسعار طلعت لفوق،بصوره غريبه لا فيها رحمه ولا عندها ريحة الذوق،الزيت والعدس والسمن والمكرونه،شرخوا فى أسعارهم،لحد ماالناس بطلت تشترى قوت ولادهم،يعنى ببساطه ياحمار ياخويا التضخم بيزيد فى مصر كل شهر،والله دى حاجه تنزل بواسير وتجيب القهر!ا

السيد الحمار بهلول بغباؤه المعهود قال،بعد ماعدل ديله وبعد أن كان مال:قصدك إن رئيس الوزاره المهندس الدكتور أمين بيضحك على شعبه من البنى أدمين؟؟ياداهيه دقى ده يبقى غش وتدليس، والحكومه ماشيه غلط وحياتها كلها تهييس فى تهييس،

وهنا كانت الساعه قد وصلت الثامنه مساء،فطلب كل من الحمير المحترمه من المترحمار كوبآ من الماء،ثم هرولوا راجعين لحاصل الحمير،بسرعه وبدون أدنى تأخير حتى يستطيعوا أن يستيقظوا بدرى،ويكون مخهم فريش وغير مهرى،ومايكذبوش على إخواتهم الحمير،ويقولوا زى رئيس الوزاره،حقيقى ده الفول زاد سعره،ده إحنا بنحارب الغلاء من جدره والتخفيض نال التضخم،والجو ربيع ده الجو ربيع وقفللى على كل المواضيع

No comments: