بينى وبينك أنا بينى وبين اللحوم عدم إستلطاف ومن الممكن
أن ألف وأدور وأقولك ياإبنى اللحوم ثبت أنها ضارة بالجسم
وأنها تزيد من الكوليستيرول الضار بالجسم،ولكن بينى وبينك
وللمرة الثانية أقولك أنا لاآكل اللحوم التى أراها يوميآ وبالرغم
أنها مذبوحة ومتعلقة عند البيه الجزار إلا أنى أراها وقد أخرجت
لى لسانها ولسان حالها يقول :عدى ياجربان أوعى تيجى ناحية
الدكان ده،الدكان ده للبهوات إللى معاهم خير ربنا ويقدروا
يشتروا كيلو واتنين،أما إنت ياغلبان روح دور على محل علاف
بيبيع القبيلة العدسية،وأبناء الجمهورية الفولية،أو دور على
فرارجى إبن ناس يرضى يبيع رجلين الفراخ إللى بيدبخها
للزباين إللى معاهم فلوس ويقدروا يشتروا فراخ وحمام وبط
فاستوقفتنى كلمة بط وصدقنى أنا من يوم ماتخرجت وأبويا
كان فرحان أوى بسبع البرمبة فعزم العيلة وأولاد العيلة على
جوزين بط وكام جوز فراخ وإحنا قاعدين قل أبويا كلوا
ياولاد واشبعوا أحسن هاييجى اليوم إللى مش هتلاقوا فيه
اللظى؟؟وكأن المقدس كان مكشوف عنه الحجاب وحصل
فعلآ وجه اليوم إللى بنتمتع فقط بالنظر للست بطة ونرمقها
بنظرات ألإعجاب وانت لايخفى عنك السبب فدكر البط النهاردة
بيوصل سعرة إلى 160 جنيه وجنيه ينطح جنيه..ولاعزاء
للسيدات؟؟تصور
بطنى بتمغص عليه من السيد عدس وبيسببلى إنتفاخات و
أشياء أخرى أنت تعرفها لما تسلم على المذكور خاصة لو
قمت ببلعه بفحل بصل...!ا
لكن أمس حلمت حلم غريب جدآ..خير طبعآ،آل إيه ماشى فى
غيط برسيم وقدامى سرب وز على بط على فراخ وقام العبد
لله بحفق جوز فراخ وبطاية وجريت ولكن صاحب الحقل
كان ورائى بالمرصاد فجرى ورائى وأحسست أنه سيلحق بى
فتركت الفراخ والبط وخلعت عودين برسيم من ألأرض
واستمريت بالجرى والراجل بيجرى ورائى برهوان يحاول
أن يمسكنى؟؟فقال الناس وهم يأسفون:الراجل بيجرى ورا
الراجل ده علشان عودين برسيم!!ا
وساعتها فعلآ قلت إللى قال إللى مايعرفش يقول برسيم صادق
وراجل دقرم..يعنى لو عديت على البيه الجزار وخطفت حتة
عضم وجريت هايجرى ورايا والناس هاتقول الراجل بيجرى
ورا الراجل علشان سرق منه حتة عضم...وإللى مايعرفش
يقول عضم..على عدس..على كافيار..وأهو كله ماشى
No comments:
Post a Comment