من فضلك حاول أن تقترض ماكينة حاسبة (ألجوريثم)وأن
تشرب فنجان من القهوة المستكوفى المفتكس لأننا بصدد
أن نقدم على عملية حسابية معقدة قد نفلح فى حلها،وقد
نستعين بصديق،أو قد نسأل رفيق.ا
الحكاية ومافيها أنى ذهبت اليوم مبكرآ لاستلام المرتب
الشهرى الذى يتفضل بابا يوسف أو جو بالموافقه على صرفه
كل شهر ولسان حاله يقول:آدى إحنا بنصرف عليكوا لوجه
الله تعالى...عايزين إيه أكتر من كده؟؟؟
والله يابابا جو إحنا كل شهر بنبوس إيدنا شعر ودقن وبنقول
ربنا يخليلنا بابا جو ورفاقه الكرام..إللى معيشينا فى
هنا ...شوف الناس ماشية بتكلم نفسها إزاى؟؟طبعآ ده من
شدة ألإنبساط والحال عال العال..ولاينقصنا سوى دعواتكم
الغالية..أنتم ورفاقكم الكرام أسيادنا وتيجان رؤوسنا التى
أصبحت وان واى ...يعنى صلعاء قحلاء لامخ فيها ولا شعراء
وذلك من كتر الشد والنتف ...تعبيرآ عن السعادة والإنتعاظ
الذى حل علينا من يوم مقدمكم المبارك ...!!ا
ماعلينا..طبعآ فى دماغى أنى سيزيد مرتبى وسأخل البيت
مثل من فتح عكا منشرح الصدر متهلل ألأسارير؟؟وأغنى وأقول
المرتب زاد..المرتب زاد..وسأتصل بالحاتى ليوضب لى و
للعيال أكلة كباب والشئ لزوم الشئ...ماتيسر من السلطات
والمخبوزات ألأفرنكية،ولايضير ألأمر شيئآ أن نتحلى بالمانجو
ألإسماعيلاوى...زبدة،أو فونس،أو حتى سكرى..هوه فيه
مانع..ولا سيادتك مستكتر عليه فردة مانجو معتبرة؟؟
وتمت إجراءات صرف المرتب..ووقعت أدناه بما يفيد
ألإستلام..وخرجت أراجع ماوقعت عليه لأجدنى قد إزداد
المرتب الموقر (وماتقولش لحد)مائة جنية فقط لاغير؟؟
طيب أكلة الكباب بخمسين جنية لوحدها؟؟والمانجو
المفتخرة الكيلو بعشرة جنيه؟؟يعنى تلاتة كيلو بتلاتين جنيه
وعشرة كيلو أرز تذكرت أن الست روز حرمنا المصون قد
نبهتنى أن خزين السنة اللى فاتت بح خلاص...وماتنساش
يابو جون تجيبلنا رز وانت جاى..ده انت ياراجل هاتقبض
النهاردة وفيه زيادة..ماتعملش حساب لحاجة...ا
أيوة ماتعملش حساب حاجة...لاهاعمل حساب ولاهارسم
هندسة..
من فضلك وماكينة الحساب وياك إحسبلى المجموع كام؟؟
على ماأتذكر من قواعد الجمع والطرح والضرب والقسمة
أن المجموع قد أقفل على مائة جنيه بالتمام والكمال...ولا
عزاء للسيدات..دى جنازة حارة ياولاد..صدقونى دى خيبة
بالويبة،قولى يابابا جو...أصرف إزاى؟؟
بينى وبينك وماتقولش لحد..هابيع النص قيراط اللى حيلتى
وهادية للراجل اللى جنبنا اللى بيسفر العواطلية رجالتنا
الحلوين وناخد وياهم أى مركب شراعية نتستف فيها ونغور
من البلد دى...قال ياقرد هايسخطوك..قال هيسخطونى إيه
غزال؟؟؟سلام ياغزال
No comments:
Post a Comment