CLICK HERE FOR THOUSANDS OF FREE BLOGGER TEMPLATES »

Wednesday, October 17, 2007

كبســــــولات بس من النوع الميجا




ألإنســــــــان

هو الحيوان الوحيد الذى له القدرة على إحداث الشــــر ...دون الحاجه إليه


حديقة الحيوان

قطعة أرض تمليك لمجموعه من الحيوانات الغير ناطقة،يستقبلون العديد من البشر جاءوا بقصد مشاهدتهم،الحقيقه أن تلك الحيوانات الغير ناطقه تجدها فرصه للمشاهدة واللهو حين تراقب هذا البشر وتنعم النظر إليه لتجده أقل مستوى منها فى عاداته وأخلاقياته


المـــــــــــاء

منك لله يامدرس العلوم أو أستاذ كرسى المـاء بالكليه،كذبت علينا حين علمتنا أن الماء سائل عديم اللون والطعم والرائحه..ياراجل عيب..المـاء سائل لونه بنى..طعمه مقزز..رائحته عطنه يبدو أنه إكتسبها من رائحة القائمين على المرفق الذى يعنى بالماء ويهتم بتوصيلها للناس...أ


المدن الجديده

جواب شكر للمهندس حسب الله الكفراوى..الوزير الذى فكر فى إنشاء مدن جديده خارج زحمة المدن المخنوقه..أشكرك لأنى وجدت فى تلك المدن متسعآ لى ولممارسة هواية ورياضة الجرى..لامشاكل تواجهنى..الفضل يرجع لتلك المدن الخاويه على عروشها إلا من كتل أسمنتيه صماء بدون سكان..يبدو أن الناس قد أجرتها للأشباح بخلو رجل مرتفع جدآ..وإلا ما كانوا فرطوا فيها؟؟؟؟


المدن الجديده....كلاكيت تانى مره


صديقى مهموم ومتضايق....طيب ليه؟؟الحكايه ببساطه جهاز التعمير بإحدى المدن الجديده أعلن عن طرح قطع "ممتازه" من أرض المدينه بقصد إستعمالها مدافن ،تكالب السماسره على حجز المقابر..خاصة أنها مقابر ترد الروح وأشتروها للمضاربه عليها وبيعها بأعلى ألأسعار..لم يلحق صاحبى قبرآ له فى هذه الدنيا؟؟؟بالذمه ده كلام ياناس...قبر لله ياعالم



مسلسلات الشهر الفضيل.....السيد رمضان


كنتى أكثر من رائعه..إستطعتى أن تدهولينا فى حارات وأنفاق حتى تهنا من أنفسنا....إللى إتجوز أربع مرات،وإللى هب لفوق وبقدرة قادر من بنت صايعه ومش لاقيه تاكل لسيدة أعمال..لنائبه فى مجلس ألأكل...إلى الخطافين النهابين الحلنجيه إللى هابشين البلد وبرضه هب لفوق أصبحوا مليونيرات...ويسافر عزت أعزه الله إلى الخارج بما هربه من هبرات؟؟؟ألله يسهله..ويعطى كل الناس
أطلب من الرب طلب::لاأريد شيئآ سوى قطره من بحر...يمكن أقدر أشترى "لآب توب"،أتمنظر بيه زى ألأولاد الروشه...هوه أنا أقل منهم والاإيه؟؟؟


آخر كبسوله والله العظيم: ولامؤاخذه..ممكن أرفع صباعى وأسأل سؤال؟؟


هيه التورتايه هتتقسم إمتى..وكل واحد يلهف نصيبه؟؟؟ ياجماعه الشيف عجز خلاص ومش قادر يعمل حاجه بعد كده..حرام عليكم عمل إللى عليه..خربها وإتنهبت وناقص كلمة
THE END



































2 comments:

Heart Beat said...

عزيزي صاحب القلب الطيب

فعلا الانسان قادر على إحداث الشر و اختراع اساليب جديدة لانتشاره و الجلوس و الانتظار لمعرفة نتيجة الاساليب الجديدة دي ايه او الادعاء بأن الرب يأتي له في المنام كل ليلة يحدثه و يتناقش معه في امور الدنيا و يقوم من النوم الصبح يغزو بلدا جديدا لان الرب في احاديث المساء امره بكده

حتى البشر في حديقة الحيوان بيتفرجوا على بعض و النميمة تشتغل بقى طول ماهما قاعدين يعني حتى مش رايحين يتفسحوا و يتفرحوا على الحيوانات ... عشان كده القرود يتقعد تضحك و تتنطط و الاسود تزأر لما البشر يعدوا من امامهم

تصدق ان الماء الملون ده بشوفه هنا برضه ... يا ترى بقى هو مرفق مياه واحد اللي بيوصل للدول العربية كلها و لا هي دي الحاجه الوحيدة الثابتة اللي زعماء العرب اتفقوا يشربوها لشعوبهم

انا من محبي المدن الجديدة و من مؤيدي العيش فيها بعيدا عن خنقة و زحمة المدن الكبرى بس مين يسمع برضه يروحوا يدوروا على شقق في وسط المدينة الكبرى بحجة ان المدن الجديدة بعيدة و مافيش مواصلات تودي هناك ... طيب ما هو لو الناس راحوا سكنوا هناك هاتلاقي المواصلات غصب عنها راحت لحد عندهم بس لسه الناس ماعندهاش صبر

و اللابتوب اللي حضرتك عايزه ده...تمشيها سيليرون و لا لازم يعني سنترينو كور دو و بكاميرا و لا لأ ..و دي في دي رايتر و لا كومبو... و كالعادة على ما نفكر في الاجابة ممكن نقطة البحر دي تكون عدت علينا ووقعت على الارض و دابت في التراب

اعتقد كده ان التورتة اتقسمت من زمان احنا بس اللي لسه فاكرين ان في تورتة ... اعتقد انهم بيضحكوا علينا لما بيقولوا ان التورتة لسه ما اتقسمتش عشان نقعد و نستنى التقسيمة و ننسى الدنيا اللي حوالينا و مانخدش بالنا بيحصل ايه و في الآخر هانقوم نمشي ده اذا قدرنا نقف على رجلينا من كتر القعدة او لو كنا لسه عايشين

love said...

Heart beatالرومانسيه فى أبهى صورها..الشاعريه فى أجمل قسماتها

ماذكرته عن الشر تمثلت أمامى المدير الذى يبحث عن الشر ليوزعه بالتساوى على موظفيه ,,وهم لم يبادروه لابخير أو بشر؟؟

تصورى أن الناس كلها تعتقد أنها بتتفرج على العجماوات دون أن تعرف أن هناك فعل إنعكاسى للحيوان ألأعجم على البنى آدمين؟؟

ألتمس عذرآ لمن يعيش فى بلاد الرمال من أن الماء قد يكون ملونآ عطنآ..ولكن تذكرى أننا نعيش فى بلد يجرى بين أحشائه شىء قديم قدم الزمن إسمه ...النيــــــــــل

أنا وأنت نعشق الهدوء ويعكر صفو مزاجنا صوت أو زن الدبابير المنتشره فى أرجاء المدينه الغليظه..لندخل سويآ فى شرنقه إسمها المدن الجديده ...بدون إزعاج..أو هزات أو..إرتجاج

عندى كتاب "كيف تصبح مليونيرآ...متأكد أنى سأحصل على سيل من الدولارات..بعد قراءته وسأشترى اللاب توب وكما دراجه ماركة "تميمه"ا

على أى حال نحن لسنا من محبى التورته أو الجاتوه...نحن نريد ونريد فقط..رغيف أسمر يصلح للإستهلاك ألآدمى..إحنا موش بنى آدمين برضه؟؟؟والا إيه؟؟