إرحمنا يابو دقن وقولنا هو لحم الخنزير حرام؟؟

www.fao.org/ag/againfo/themes/.../meat/backgr_composition.ht

بطبيعة الحال لايمكن العنوان أعلاه عنوان بيتنا،أو عنوان

الحلاق إللى ساكن جارنا،ولكنه موقع لمنظمة ألأغذية و

الزراعة ومقرها إيطاليا حيث استجمعت شجاعتها وقامت

مشكورة وغير مقهورة بمنحنا التركيب البنائى لبعض

أصناف اللحوم،ولم يكن القصد أو عقد النية لأن أقوم

برفع الضغط عند سيادتك أو أن أحدث فى جسم 

سعادتك حساسية لدى رؤيتك للى ماتسماش والتى كانت

زمان تعرف باللحمة أما اليوم فأصبحت لاتراها إلا فى متاحف

آخر زمن والتى يطلق عليها من باب الدلع محلات الجزارة و

الواقع أنها أصبحت محلات لزيادة ألأرتيكاريا لدى خلق الله

وإللى مش عاجبه يرحل ؟؟

الجدول المرسوم يعلن أن لحم الخنزير لايختلف عن لحم البقر

أو لحم التور ولامؤاخذة يعنى كلهم فى الهوا سوا وماحدش

أحسن من حد...؟؟

أمال إيه الهوسة والغاغة إللى أبودقن وأبو لحية عاملها وكل ما

يتكلموا يقولك لا..لا..لاتأكل لحم الخنزير،إنه حرام وممنوع 

التصوير أو ألإقتراب..وعليه الطلاق لو أكلت منه هتروح

النار وماليش دعوة بيك...إنت إللى اخترت وانت إللى أكلت

ياناس بطلوا إستهبال وقولوا تفسير مقنع أو سبب عليه الطلا

علشان نقولكم سمعآ وطاعة..إحنا متشكرين على معلوماتكم

العلمية ولو أكلنا من لحم الخنزير خلوا جمعية ألأمر بالمعروف

والنهى عن المنكر الموجودة فى بلاد ألأجلاف،ولعلمكم ستفتتح

قريبآ لها فرع فى مصر المحروسة !!اخدونا من الدار للنار واحنا

آسفين وحقكوا علينا.ا

*************************

فى بلاد الكفرة والمشركين لما وفد من برة يحب يقعد مع وفد من جوة

يعنى جلسات مباحثات بنشوف كبايات بيسموها بالخوجاتى كؤوس

وهى جمع كاس لتصب فيه من أنواع الخمور مالذ وطاب..إشى

ويسكى،وإشى كونياك،وإشى فودكا لكن لافيه بوظة ولاطافية

الأصناف العرة دى مش موجودة إلا حدانا فى الكفر أو فى ميت

حدر بالمنصورة ومايستخدمهاش إلا الناس إللى ضاربها السلك

ويدوبك يشربله قرعاية بوظة علشان ينسى إللى شايفه من مراته

أو إللى مورياهوله حماته،أو لما يفتكر إن ابنه قاله النهاردة يابا إنت

شفت الدبيحة إللى معلقها المعلم قورمة إللى على الناصية إللى

فى الحارة؟؟يقوله بكل برود وعنيه بتطق شرار:ا

ياد ياعبيط دى لحمة حمير مضروبة وانت عارف إننا ماناكلش إلا

الإنتركوت ألأصلى أو الضانى ألأوزى إنت نسيت ولاإيه؟؟

هذه هى بعض المشاكل التى تأتى وراءها مقررات النكد اليومية

التى لايجد الفحل منهم سوى أن يعبى ويديها بوظة ولعلمك

فتأثير البوظة كتأثير الفودكا تمامآ والنتيجة النهائية هى الغيبوبة

عن الدنيا والخدر اللذيذ ونسيان اللحمة واللى منع اللحمة و

اللى رفع سعر اللحمة ومش عارف ليه دايما لما الواحد منهم ينبسط

ويمخمخ يذكر الدنيا بكلام قبيح ياى سوفاج خالص مش فاكر بيقولوا

إيه...أم الدنيا ...حاجة زى كدة مش بقولك سوفاج خالص؟؟

لما تسأل الخواجة إللى بيشرب كاس أو كاسين من الفودكا ليه ياخواجة

بتشرب الخمرة دى حرام وربنا هيدخلك سقر أو هتنام نوم العازب فى

السعير،تجد أنه مذاكر لما يقولك على الفور:شوف خبيبى الخمرة دى

لها فوايد للأنا وللأنت،منها لما تشرب كاس وماتزودش عن اتنين

يحصل لك زيادة فى التركيز لما بتكون بتفكر فى حاجة علشان 

كدة بنشرب الخمرة فى المباحثات أو المفاوضات وقصدنا شريف

والله أنه مفيش حد يضحك علينا أو زى مابتقولوا عندكوا

يستكردنا أو الشعب بتاع إلأحنا يقول علينا كروديات

ولم أكن أعلم أن الخواجة إبن الإيه يعرف معنى كروديه وكروديات

الظاهر أنا إللى طلعت كرودية لما صدقت أخونا أبو دقن وعمنا

أبوزلومة لما قال الخمرة حرام..حرام عليك ياأخى ده أنت طلعت

كرودية وصدقت إللى بالى بالك لما حرم الخمرة..قطيعة تقطع ألأفيون

وسنينه والهريسة واللى بياكلوها..المرة الجاية هاقولك إيه حكاية

الهريسة دى باى باى كمبورة