على كل لون ياباتستة

المصريون لما الواحد منهم مايكونش له مزاج يتكلم أو ياخد 

ويدى وياك فى الكلام يقولك حل عنى أنا قرفان وماتتكلمش ويايا

أو يبصلك من فوق لتحت ويقولك مليش مزاج أرد عليك؟؟؟؟

تعرف إنى حاليآ ماليش مزاج أتكلم مع حد!!ولا عاوز أبص فى

خلقة أى بنى آدم،حتى المرضى إللى باتعامل وياهم مافيش نفس

أتكلم وياهم زى زمان ..يعنى كلمة من هنا وكلمة من هناك على

ضحكة حلوة من الجنس اللطيف أو نكتة دمها حلو خفيف من

شباب زى الورد بيسألوا على قرص ترامادول وحياتك يادكتور

أصل دماغى هايفرقع ومش قادر على الصداع؟؟؟ياخسارة على

شباب مصر الحلوين إللى المفروض إن مصر بعد 25كانون تانى

هتبنى نفسها بيهم وهاتخرج من عنق الزجاجة برضه بيهم؟؟

معناة الكلام إن المستقبل مظلم طالما الشباب بيبرشم أو بيضرب

أنفاس أو بيشم بودرة وبيطلع من مناخيره دخان وإذا لزم ألأمر 

يطلع الدخان من ودانه ..ماهى مصر على غير مثال بنت الهرم

وأولادها لعبوا بيه لغاية ماتخرم!!ا

بالذمة ده كلام ياعبد السلام؟؟

إيه إللى بيحصل ياناس؟؟دقون واصلة لغاية وسطهم ويقولوا

قال الله وقال الرسول وإحنا عايزين شرع ربنا يطبق فى مصر

يعنى إللى يسرق تنقطع إيده،وإللى يزنى نقطعله مش عارف

إيه(المعنى فى بطن الشاعر)ولامؤاخذة...طيب إللى يخطف ثورة 

يامولانا نعمل فيه إيه؟؟ياترى نهشتكه وندلعه ونقوله برافو

ياعم الشيخ..أحسنت ثم أجدت ثم خسئت إلى مالانهاية وياريتك

تعرف يعنى إيه مالانهاية،أصل المالانهاية لم تكن فى عصر

الرسول يعنى ليست من أبجديات السلفية،أو من أدبيات ألإسلام

يعنى لم تكن موجودة من 14قرن..قرن ينطح قرن؟؟؟

ياناس حرام عليكوا التهريج إللى عايشين فيه من سلفية أو

أصولية..أو بامية أو فاصولية.ا

أول إمبارح بسلامته المتحدث الرسمى لجماعة ألألوان وعلى

فكرة كان فيه راجل يهودى كان يشيل كام توب قماش على

كتفه والمتر فى إيده وينادى ويقول:على كل لون ياباتسته

والنسوان عاديك يتلموا عليه وضحكة من دى وسرسوعة من 

دى يبيع الراجل كل الباتستة ويلم الفلوس وبرضة وهوه

راجع تسمعه ينادى ويقول:على كل لون ياباتستة...!!ا
على فكرة اليهودى ده بيفكرنى بأخونا إللى يقول أى كلام
لكن المهم إن دستور مصر لازم يطبق الشريعة ألإسلاميه
والكلام ده بيقوله رايح جاى حتى بعد مايبيع الباتستة و
يلم الغلة من السعودية أو قطر أو حتى بوركينا فاسو مش
مهم المهم يبيع وبس؟؟

نرجع لأخونا الفقيد المتحدث الرسمى إللى كان كلامه كله

دلع وتسييح فى زين الرجال الهمام الطيب رجب أردوغان

أصله راجل مسلم على حق،وقدر بقدرة قادر أن يرفع بلده

من الحضيض أو سابع أرض لفوق فوق أوى لسابع سما

يعنى بالعربى كان عنده أردوغان أحسن من الكافر آينيشتين

أو المدعو أحمد زويل على ألأقل ده رئيس حزب إسلامى

ولايتعامل مع الكيميا أو السيميا ولا علوم الشيطان؟؟

واستمر الحال على هذا المنوال لغاية المدعو أردوغان

مافلت لسانه وقال يجب أن يكون إتجاه مصر إتجاه علمانى

ياسنة سوخة ياولاد..علمانى يعنى الراجل ده لامسلم ولا

يحزنون..وعنها وبعد تلاتين ثانية طلع علينا المتحدث 

الرسمى للسكلان بأن أردوغان ده مش مننا ولانعرفه

ولاعاوزين نجيب سيرته..ده طلع من الكفرة...العلمانيين

بالذمة ده كلام ياأردوغان؟مش كنت تاخد تصريح قبل

ماتفتح بقك...أو كنت تحاسب على كلامك..يخونك الطبيخ

إللى طفحته فى بيتنا..والملوخية إللى شربتها 

الظاهر أردوغان ماسماش قبل مايشرب الملوخية..ويقال أنه

بعد ما طفح ألأكل نام وسمعوه بيحلم وبيقول أقسم بالله

إن الناس دى مخها طاقق وماهم فالحين لافى ثورة ولاحتى

فى مسح السبورة بالباشورة...وعجبى