بابا حسنى يناهز الثمانين من عمره المديد؟؟
طيب وانت مالك ومال عمره أو سنه؟؟هل
طقت فى دماغك أن تتقدم لمصاهرته أو فى
عمل بيزنس نسب ؟؟؟
وبخبث شديد يبدأ الولد الشقى فى الكلام و
بدون مقدمات أو حتى سلام تجده ولامؤاخذه
ينطح أو يشطح فى الكلام؟؟إزاى؟؟
على فكرة علامات ألأستفهام أصبح لها رصيد
كبير فى الكلام الذى هو دائمآ مايكون ابن عم
الحديت...ا
يقول الولد الشقى الذى تمرمط فى أقسام البوليس
ونام على ألأسفلت فى عز برد طوبة وأمشير أن
الرئيس مبارك قد شمع الفتلة يوم السادس من
أكتوبر العظيم سنة ثلاثة وسبعين،وجعل الصهاينة
يلطمون على خدودهم،وولولت جولدامائير وبكت
من أعماقها بكاءآ ولا بكاء العوانس المعنسين
وقالت لكيسنجر ياتلحقنا ياماتلحقناش..وانتهت
أسطورة جيش الدفاع وأصبحت خيبته بجلاجل
وكل ده والكلام مازال للواد الشقى ينسب الفضل
كل الفضل لبابا حسنى ولكن الواد الشقى فى حلقومه
كلام تانى عاوز يقوله...ياترى مازال عنده قدر من
الشجاعة ليقول أم أنه ترك جاكت الشجاعة وألإقدام
فى السجن وعلى ألأسفلت ولما خرج أصبح ياولداه
بنص لسان ولا يستطيع أن يقول جملة مفيدة؟؟
هذه المرة نطق ولم ينطق كفرآ كما يقولون..بل أن
الولد الشقى بعبع وفضفض عن إللى جواه وزى ما
تقول قال فى سره يعنى هايسخطوك ياقرد..ههه هيسخطوك
يعنى غزال؟؟
أنا شخصيآ استجدعته واسترجلته جدآ لما قال الرئيس
ربنا يديله طولة العمر أصبح لايستطيع تحمل المشاكل
الدوليه والمناوشات الديبلوماسية والتى تستلزم أعصاب
فولاذية تكون على ألأقل على الزيرو زى العربية الفيات
أو الله يرحمها ويرحم أيامها العربية النصر إللى كانت
زمان شركة إسمها شركة النصر للسيارات بوادى حوف
فى طريق باب اللوق حلوان بتصنعها وكانت زى العسل!ا
موتورها قوى زى ألأعصاب القوية إللى لازم تستحمل
رزالة وتلاقيح مشاكل الحكم..من التهديد ألأفريقى لمصر
فى رزقها ورزق عيالها لمياه الشرب فى نيلها العظيم
حتى مشكلة الكورة والعلقة التى أكلتها مصر من ألأخوة
ألأشقاء الجزائريين بمناسبة غلبهم لها ودخولهم كاس
العالم؟؟ياعالم والله ده شىء يجنن...ا
الطب وعلوم الفيسيولوجى والباثولوجى والطب النفسى
وطب ألأعصاب كلهم بيضعوا حد أو عمر إفتراضى للبنى
آدم وبعده نقوله متشكرين إنت عملت إللى عليك وزيادة
ومن حقك وكمان من واجبنا نقولك متشكرين يابابا ولو
كان زيادة شويتين نقوله ياجدو ..ارتاااااح واتفرج على
التليفزيون زى خلق الله أو اتفسح فى دول العالم زى
السياح إللى بعد مايخلصوا السن الوظيفى ويتحالوا على
المعاش تلاقيهم يطيروا لمصر ويزوروا ألآثار أو يقولك
أصل أنا مجنون بالأيجيبتيولوجى وعلشان كدة بازور
مصر وامنيتى أموت فيها واندفن تحت سفح الهرم؟؟
ومن جهة أخرى تشكلت حركة أطلقت على نفسها إسم
حركة كفاية،وهى تسمية مطاطة زى القماش إللى عرضه
عرضين يعنى تاخد راحتك وانت بتفصله أو تحيكه...ا
كفايه تقول أنها كفاية لأوضاع مهينة تحكم المجتمع
المصرى من قوانين وثوابت عفا عليها الزمن أو أصبحت
من زمن فات وأكل منها الدهر وشرب ويلزم تغييرها أو
تجديدها..طيب وإيه كمان؟؟
يقول الولد الشقى وكمان نظام الحكم فى مصر لاينتسب
بالمرة لما يطلق عليه النظام الديموقراطى أو الديموقراطية
ومنها ما يعرف باسم التوريث؟؟
وبخبث شديد كان واجبآ على أن أستفسر من هذا الولد الذى
يبدو أنه هيودينى ورا الشمس أو هيعزمنى على نومة على
ألأسفلت فى سجن طرة أو قرة ميدان سابقآ!ا
يقول الولد الشقى ورزقه على الله ..وأهم شىء تنادى به
كفايه هو ...لا للتوريث يعنى كرسى الرئاسة ممنوع أن
يتوارثة ابن الرئيس كما يحدث فى بلاد أخرى مجاورة أقل
ما توصف به أنها بلاد تركب ألأفيال أو تعيش على القات
ومن يحكمها عيال فى عيال!!ا
إيه رأيك...تعرف إن كلام الولد الشقى دخل نغاشيشى وخيش
فى دماغى وقلت بس فى سرى...ممكن ياسيادة الولد الشقى
تسحبلى استمارة من سيادة ألأدارة علشان أكون عضو ولو
عضو شرف فى حركة كفاية؟؟
ويسألنى الولد الشقى بخبث ومن تحت لتحت:
ليـــــــــــــــــه؟؟؟إنت ناوى تكون أبوزمل فى سجن طرة؟؟
ولم أجاوب على رأى إللى بيقول لامن فوق ولا.....ا
No comments:
Post a Comment